Asset Publisher

በኤጀንሲው የ6 ወር አፈጻጸም ሪፖርት ላይ ውይይት ተካሄደ

 


 

አዲስ አበባ የካቲት 6/2012፡- የኢንፎርሜሽን መረብ ደህንነት ኤጀንሲ (ኢመደኤ) የ2012 የመጀመሪያ ግማሽ በጀት አመት የሥራ አፈጻጸም ሪፖርት የኤጀንሲው ዋና ዳይሬክተር እና ምክትል ዋና ዳይሬክተሮች በተገኙበት ለተቋሙ ከፍተኛ አመራሮች የቀረበ ሲሆን፤ ሪፖርቱን ተከትሎም ውይይት ተካሂዷል፡፡


ከቀረበው ሪፖርት ባሻገር አዲስ የተሾሙት የኤጀንሲው ዋና ዳይሬክተር ዶ/ር ሹመቴ ግዛው እና ም/ዋና ዳይሬክተሩ አቶ ከፍያለው ተፈራ ከኤጀንሲው ከፍተኛ አመራሮች ጋር ትውውቅ አድርገዋል፡፡

በዚህም የተቋሙን ተልዕኮ በማሳካት ረገድ ከአመራሩ እና ከመላው የተቋሙ ሠራተኞቸ ጋር በቅርበት ለመስራት ያላቸውን ቁርጠኝነት ገልጸዋል፡፡


ኢመደኤ ከፍተኛ የሕዝብና የመንግስት ተልዕኮ የተሰጠው ተቋም እንደመሆኑ መጠን በሀገሪቱ የሠላም፣ የልማትና የዲሞክራሲ ጉዞ ቁልፍ አስተዋጽኦ የሚያበረክት እንደሆነ የኤጀንሲው ዋና ዳይሬከተር ዶ/ር ሹመቴ ግዛው ገልጸዋል፡፡

በመሆኑም ሁሉም አመራርና አባላት ለተቋሙ ተልዕኮ መሳካት የሚኖራቸው ሚና የላቀ መሆኑን በመገንዘብ በቁርጠኝነት መስራት እንደሚጠበቅባቸው አጽንኦት ሰጥተዋል፡፡


በዕለቱ ኤጀንሲው ባለፉት 6 ወራት በተለያዩ ዘርፎች ያከናወናቸውን የሥራ አፈጻጸም ጥቅል ሪፖርት ቀርቧል፡፡


የቀድሞው የኤጀንሲው ም/ዋና ዳይሬክተር የነበሩትና በአሁኑ ወቅት የአርቲፊሻል ኢንተሊጀንስ ምርምርና ልማት ማዕከል ዋና ዳይሬክተር የሆኑት ኢንጂነር ወርቁ ጋቸና ኤጀንሲው ባለፉት 6 ወራት ያከናወናቸውን ዋና ዋና ተግባራትን አስመልክቶ ሪፖርት አቅርበዋል፡፡

 

ኤጀንሲው በሳይበር ደህንነት ዘርፍ የተለያዩ ጥናትና ምርምሮችን ማድረጉ፣ ወደ ሀገር ውስጥ በሚገቡና በሚወጡ የቴክኖሎጂ ምርቶች ላይ ቁጥጥር ማከናወኑ፣ በሀገሪቱ ላይ ሊቃጡ የሚችሉ የሳይበር ጥቃቶችን በመከላከል እንዲሁም የተቋማትን አሰራር በማዘመን በኩል ፋይዳቸው ከፍተኛ የሆኑ ሥራዎችን ባለፉት 6 ወራት ማከናወን መቻሉን ገልጸዋል፡፡


በአጠቃላይ የቀረበውን ሪፖርት ተከትሎ ሠፊ ውይይት የተደረገ ሲሆን፤ ቀጣይነት ያለውና ተልዕኮን ማሳካት የሚያስችል ተቋማዊ የአሰራር ሥርአት መዘርጋት እንዲሁም ሁሉም የተቋሙ አመራርና ሠራተኞች ማበርከት የሚገባቸውን አስተዋጽኦ እንዲወጡ ማስቻል በቀጣይ ትኩረት የሚሰጠው ጉዳይ እንደሆነ ዋና ዳይሬክተሩ ተናግረዋል፡፡


የኤጀንሲውን ተልዕኮ ማዕከል ባደረገ መልኩ ተቋሙ በወቅታዊነት ያሉበትን ተግዳሮቶች በአጭር ጊዜ በመፍታት እንዲሁም ያሉትን ጠንካራ ጎኖች በማስቀጠል የሚጠበቅብንን ሃላፊነት በተሟላ መልኩ መወጣት ይገባናል ሲሉም የኢመደኤ ዋና ዳይሬክተር ዶ/ር ሹመቴ ግዛው መልዕክታቸውን አስተላልፈዋል፡፡

Most Viewed Assets

በብዛት የተነበቡ ዜናዎች

ኢሞቴት ቫይረስ በድጋሚ መከሰቱ ተነገረ
  • ኢሞቴት ቫይረስ በድጋሚ መከሰቱ ተነገረ Thu, 26 Sep 2019
ኢትዮጵያና እስራኤል በሳይበር ደህንነት መስክ በጋራ ለመስራት ተስማምተዋል
  • ኢትዮጵያና እስራኤል በሳይበር ደህንነት መስክ በጋራ ለመስራት ተስማምተዋል Wed, 25 Sep 2019
በኤሌክትሮኒክ መገልገያዎች ላይ የተጋረጠውን የሳይበር ደህንነት ስጋት እንዴት መቅረፍ እንችላለን?
  • በኤሌክትሮኒክ መገልገያዎች ላይ የተጋረጠውን የሳይበር ደህንነት ስጋት እንዴት መቅረፍ እንችላለን? Wed, 25 Sep 2019