የግብጽ ፓርላማ ማህበራዊ የትስስር ገጾችን መቆጣጠር የሚያስችል ረቂቅ አዋጅ አፀደቀ

ግብጽ ማህበራዊ የትስስር ገጾችን መከታተልና መቆጣጠር የሚያስችል ረቂቅ አዋጅ አፀደቀች። ሐምሌ 9/2010 ዓ.ም በሃገሪቱ ፓርላማ የፀደቀው ረቂቅ አዋጅ፥ ከፍተኛ ተከታታይ ያሏቸው ግለሰቦችና ተቋማት ማህበራዊ የትስስር ገጾች በመንግስት አካላት ቁጥጥር እንዲደረግባቸው የሚያዝ ነው። በዚህ መሰረት በማህበራዊ ትስስር ገጾች ከ5 ሺህ በላይ ተከታዮች ያላቸው ግለሰቦች አድራሻ በሃገሪቱ የመገናኛ ብዙሃን ምክር ቤት ክትትል የሚደረግበት ይሆናልም ነው የተባለው። ረቂቅ አዋጁ የግለሰቦች አድራሻ፣ ጦማሪያን፣ ድረ ገጾችና መሰል የማህበራዊ ትስስር ገጾችም ጥብቅ ቁጥጥር እንዲደረግባቸው ያዛል። ይህ ደግሞ በሃገሪቱ ሃሰተኛ መረጃዎችን እንዲሁም ከሃገሪቱ ህግና ደንብ ውጭ በሆነ መልኩ ማህበራዊ ሚዲያ ላይ የሚሰራጩ መረጃዎችን ለመከላከል ያለመ መሆኑን ከስፍራው የሚወጡ መረጃዎች ያመላክታሉ። መገናኛ ብዙሃን ምክር ቤቱም ከዚህ ህግ አንጻር በተቃራኒው በሆነ መልኩ ተንቀሳቅሰዋል የተባሉ አድራሻዎችን የማገድ ስልጣንም ይኖረዋል። አሁን ላይ በፓርላማው ጸድቆ የፕሬዚዳንቱን ይሁንታ የሚሻው ረቂቅ አዋጅ፥ በመሰል ተግባር ላይ ተሰማርተዋል የተባሉ ግለሰቦች እንዲቀጡ የሚያዝ አንቀጽ እንደሌለው ተገልጿል።

አዲሱ ረቂቅ አዋጅ በዚህ መልኩ ተሳትፈዋል የተባሉ ግለሰቦችን አድራሻ ከማገድና ከመዝጋት ውጭ እነርሱ ላይ ምንም አይነት ቅጣት እንዲወሰንም ሆነ እንዲተላለፍ አያዝም።

በሃገሪቱ ባለፈው ወር የሃገሪቱን ሉዓላዊነት ሊጋፉ በሚችል አልያም ኢኮኖሚዋ ላይ ጉዳት በሚያመጣ መልኩ ተንቀሳቅሰዋል በሚል የተጠረጠሩ ድረ-ገጾችን መዝጋት የሚያስችል ህግ መፅደቁ ይታወሳል።

ግብጽ ከሚዲያ ነጻነት ጋር በተያያዘ ከፍተኛ ጥሰት የሚፈጸምባት ሃገር መሆኗን መረጃዎች ያመላክታሉ።

ከዚህ ጋር ተያይዞ እስካሁን ወደ 500 የሚጠጉ ድረ ገጾች የተዘጉ ሲሆን፥ በርካታ ጋዜጠኞችም እስካሁን በእስር ላይ ይገኛሉ።

https://www.bbc.com/news/world-middle-east-44858547